गुप्तालाई सफाइ दिने न्यायाधीश कारबाहीमा !

सर्वोच्च अदालतले भ्रष्टाचारको मुद्दामा अभियोग लागेका सूचना तथा सञ्चारमन्त्री जयप्रकाश प्रसाद गुप्तालाई सफाइ दिने विशेष अदालतका न्यायाधीशलाई न्याय सम्पादन कार्यमा विचलित भएको प्रष्ट देखिएकाले प्रचालित कानुनबमोजिम कारबाहीको गर्न निर्देशन दिएको छ।  सर्वोच्च अदालतले दुई वर्षअघि नै भ्रष्टाचार मुद्दामा सफाइ दिने न्यायाधीशहरूलाई कारबाही सिफारिस गरे पनि प्रक्रिया सुरु नगरेका बेला सर्वोच्चको फैसलाले न्याय परिषद्लाई दबाब दिएको हो। गुप्तासँग भएको सम्पत्तिको स्रोत खुलेको भन्दै २०६४ जेठ २४ मा विशेष अदालतले उनलाई सफाइ दिएको थियो । त्यतिबेला विशेष अदालतका अध्यक्ष भूपध्वज अधिकारी तथा सदस्यद्वयमा कोमलनाथ शर्मा र चोलेन्द्रशमशेर राणा थिए ।फैसलाको पूर्णपाठ हात पर्नेबित्तिकै कारबाहीको प्रक्रिया सुरु गरिने परिषद्का सदस्य सचिव जीवनहरि अधिकारीले बताए। न्यायाधीशद्वय सुशिला कार्की र तर्कराज भट्टको संयुक्त इजलासले विशेष अदालतको फैसला उल्ट्याउँदै उक्त अदालतका न्यायाधीशले मिसिलमा संलग्न प्रमाणको मूल्याङ्कनमा लापरबाही गरेको, प्रतिवादीलाई सफाइ दिने भावनाले वयानमा जिकिर लिएभन्दा बढी र वयानमा जिकिर नै नगरेका शीर्षकबाट पारिश्रमिक आयलाई मान्यता दिएको र वैदेशिक भ्रमणभत्तावापतको रकममा दोहोरो हिसाब गरी आयलाई मान्यता दिएको उल्लेख गरेको छ।

स्रोत: टेलिभिजन न्युज/source: Television news